港燦Pigsfarm生活點滴

先旨聲明，工作上去了此店試食，因此免費吃麵，但以下評論絕對中肯。此店號稱兩項鎮店之寶：烏雞湯底和天降石碗，但是賣點並不突出。

乜解究咁講呢？烏雞湯底只是每天用上三隻烏雞加進原有鮮雞、雞腳、豬手等湯料中一起煮，因此係完全食唔到有烏雞味，不過咁都係正常，如果去食拉麵湯底好似蛇王芬碗參鬚玉竹煲烏雞咁，就認真攪笑兼趕客咯！

另外此店話有用天降石嚟淨化啲水，有一大舊放咗喺煲入面，另外碗亦係天降石入嘅。先唔好理乜嘢係天降石先，咁煞有介事咁大叔於是就諗難道隻碗係用塊石彫出嚟？再唔係石粉塗係碗內側？到場見到原來一 pat好似紅毛泥咁黐喺碗底，話咁樣黐咗好味啲......OMG！我相信呢家嘢係青山方面應該好興吓，不過係香港嗰個青山......

好勒！吐槽（oh! very mainland China)完之後呢，咁講真其實碗麵係可以嘅，大叔呢個極上味噌拉麵用直身麵，湯底質地適中能夠掛喺麵上，油份其實比隱家、豚王等等重，不過就未及秀同埋魂，算係比較接近日本嗰邊食到嘅拉麵湯底。叉燒切得薄，呢層應該好多人唔鍾意，用嘅肉比較肥，呢層就應該多數人鍾意，大叔好奇怪喜歡薄切瘦叉，覺得此店叉燒算係可以，煮得好柔軟入口溶呢點值得讚。蛋唔得流心；筍有少少渣，呢啲可以做得更好。大叔鍾意洋蔥，因此喜歡佢哋有炸洋蔥，難得炸完只有甜味無苦味，真係唔知佢哋點做到？圖中洋蔥份量加多咗，自己去正常應該係減半。

另外佢哋亦有大熱嘅沾麵（佢哋叫油撈麵），每日限定只賣二十碗，大叔覺得多數沾麵都超鹹唔多啱口味，因此只影相無試。

除咗兩個賣點比較無力之外，其實都算可以，如果經開嗰頭係可以一試。

烏骨雞拉麵龍
地址：九龍尖沙咀柯士甸路15號金巴利大厦地下A店
電話：2312-7773